5. Мэта аддання і ўнутраная прыхільнасць нявольніка Марыі

Якая мэта аддання?

Мэта аддання не адрозніваецца ад галоўнай мэты твайго жыцця. Навошта ты жывеш? Бог даў табе два заданні. Узрастанне да поўні ўласнай асабовасці і дапамога іншым, каб і яны асягнулі сваю поўню. Праз адно і другое Бог атрымлівае найвялікшую хвалу.

У фізічным плане ты расцеш ад дзіцяці да дарослага чалавека. Узрастаеш розумам, навучаючыся, атрымліваючы адукацыю і набываючы жыццёвы досвед. Толькі ў рэлігійнай і маральнай галіне мы часта застаемся на ўзроўні недаразвітых дзяцей. Эгаіст, ганарлівец, лянівы – гэта людзі недаразвітыя маральна. Кожны грэх – гэта знак маральнага недаразвіцця, духоўнага калецтва, знак недахопу поўні чалавечнасці. 

Калі ты аддасі сябе Марыі, Яна дапаможа табе вылечыцца ад парокаў і грахоў. Табе ўжо не трэба будзе саромецца таго, што ты маральна недаразвіты. Яна дапаможа табе дайсці да поўні духоўнага ўзросту. Навучыць цябе верыць, давяраць і любіць бліжняга. З Яе дапамогай ты зможаш жыць так, каб ні аб чым не шкадаваць.

Хто аддае сябе Маці Божай, тым Яна паслугоўваецца дзеля збаўлення бліжніх. 

Бог прагне збавіць усіх людзей, якія жывуць у свеце. Ён пастанавіў, аднак, што ў збаўленні Яму павінны дапамагчы самі людзі. Марыя атрымала ад Бога ласкі для збаўлення ўсіх людзей, але Яна будзе радавацца ўратаванню ўсіх, калі знойдзе такіх, якія Ёй дапамогуць. 

Аддаўшы сябе Марыі, ты станеш Яе начыннем у збаўленні. Яна чакае такіх людзей. Яна прасіла ў Фаціме аддаваць сябе Ёй. Яна праз тваё адданне і праз цябе зможа шмат каго ўратаваць ад вечнага асуджэння. Ці хочаш ты быць у руках Марыі начыннем збаўлення свету?

Якой павінна быць унутраная прыхільнасць людзей, якія аддаюць сябе Марыі?

Нельга аддацца таму, каму ты не давяраеш. І наадварот, ты можаш аддаць сябе Марыі, калі маеш да Яе цалкавіты давер. Давер, гэта ўпэўненасць у тым, што Марыя не падвядзе.  Ці ты гатовы брацца дзеля Яе, калі Яна гэтага захоча, за справы па-людску немагчымыя?

Нельга аддацца таму, каго не любіш. Адданне сябе без любові не мае сэнсу. Сапраўдная любоў не шукае асабістага дабра, а дабра таго, каго любіць. Ці ты любіш Марыю так, што прагнеш для Яе дабра, што гатовы шмат, а нават усё аддаць, каб памнажаць Яе хвалу і радасць? Каб аддаць сябе Марыі, трэба ведаць Яе ролю ў справе збаўлення і асвячэння людзей. Яна з’яўляецца надзвычайнай Маці ўсіх і Пасрэдніцай ласкаў. Па волі Божай Яна кіруе ўсімі Божымі моцамі ў змаганні за Божае Валадарства. Яе шматлікія аб’яўленні ўказваюць на тое, што Бог прагне, каб Яна выступіла на арэне барацьбы з сатаной за душы. Аддаючы сябе Ёй, ты аддаеш сябе Усемагутнай Каралеве і Спадарыні.