Трэці дзень: я з’яўляюся грэшнікам.

Малітва да Святога Духа

Прыйдзі, Стварыцель Дух Святы, 

Наведай вернікаў сваіх, 

Напоўні ласкай з вышыні 

Сэрцы, што створаны Табой.

Названы Суцяшыцелем, 

Ты - найвышэйшы Бога дар,

Жыцця крыніца і любоў, 

І ўзмацненне нашых душ.

Ты спасылаеш сем дароў, 

Бо маеш сілу ад Айца. 

Праз Сына абяцаны нам, 

Ты мноствам моваў прамаўляў.

Сваёю ласкай асвяці 

Сэрцы і розум нашыя,

І целы нам аздараві, 

І нашы цноты ўзмацняй.

Ты злога духа адгані 

І супакоем адары, 

Заўсёды за сабой вядзі 

І прабачэнне грэшным дай.

Дай праз Цябе Айца пазнаць 

І шлях да Сына пакажы.

Ты - Дух любові іх дваіх, 

Верым Табе ва ўсе часы.

Богу Айцу хвала заўжды

І Сыну ўваскрэсламу. 

Суцяшыцелю, Табе 

Хвала на вечныя вякі. Амэн.

Біблійнае чытанне: 1 Ян 1, 8-10  

Ключавыя словы і фразы для разважання:

• «Мы з’яўляемся грэшнікамі»

• «Мы павінны вызнаваць свае грахі, каб быць прабачанымі» 

8 Калі кажам, што не маем граху, ашукваем саміх сябе, і няма ў нас праўды. 9 Калі ж вызнаём грахі нашыя, то Ён, верны і справядлівы, адпусціць нам грахі і ачысціць нас ад усялякай несправядлівасці. 10 Калі кажам, што мы не зграшылі, то робім Яго ілгуном, і няма ў нас слова Ягонага. 

Або іншае чытанне: Папа Францішак вызнае, што ён грэшнік (Рым 20 верасня 2013). 

«Хто такі Хорхэ Марыя Бергогліо?» Папа Францішак адказвае: "Я грэшнік". Ён маўкліва глядзіць на журналіста. Я пытаюся ў яго ці я маю права задаць гэтае пытанне... Ён ківае галавой і кажа мне: «Я не ведаю якое азначэнне магло б быць больш дакладным... Я грэшнік. І гэта самае справядлівае азначэнне... Гэта не нейкі літаратурны вобраз або выраз. Я грэшнік.» Папа разважае далей, так, як бы ён не чакаў гэтага пытання і быў змушаны да больш глыбокага роздуму. «Так, я магу сказаць, што я трохі спрытны, што ўмею добра кіраваць справамі, але праўда таксама і тое, што я трохі наіўны. Так, але найлепшая выснова гэта тая, што знаходзіцца глыбока ўнутры і якую я лічу найбольш праўдзівай, а менавіта гэтая: я грэшнік, на якога Бог скіраваў свой позірк.» Потым зноў паўтарае: «Я чалавек, на якога Бог скіраваў свой позірк.» 

Чытанне святога Людвіка дэ Манфора: Трактат аб сапраўдным ушанаванні Найсвяцейшай Дзевы 99-100 

Ключавыя словы і фразы для разважання:

• «Пазбягаць граху»

• «Рабіць намаганні, каб пазбягаць граху»

• «Маліцца ружанец, разважаючы над таямніцамі»

• «Шкадаваць за свае грахі» 

[99] І я кажу, што так злоўжываць ушаноўваннем Найсвяцейшай Дзевы, якое пасля ўшанавання нашага Госпада і  Найсвяцейшага Сакраманту самае святое і велічнае, — азначае, учыніць найвялікшае блюзнерства, што пасля блюзнерства нягоднага прыняцця Святой Камуніі самае вялікае і невыбачальнае.

Я прызнаю, што, каб мець ласку сапраўднага ўшанавання Святой Дзевы, не абавязкова быць настолькі святым, каб пазбягаць кожнага граху, хоць і трэба гэтага жадаць. Але трэба прынамсі (трэба добра занатаваць тое, што я зараз скажу):

•  Па-першае, трэба мець шчырую пастанову пазбягаць хаця б смяротнага граху, які зневажае як Маці, так і Сына.

•  Па-другое, трэба прымушаць сябе пазбягаць граху.

•  Па-трэцяе, уступіць у марыйнае брацтва, маліцца на ружанцы ці чытаць іншыя малітвы, захоўваць пост у суботу і гэтак далей.

[100] Гэта вельмі неабходна дзеля навяртання грэшнікаў, нават самых зацвярдзелых. І калі ты, мой чытач, у гэтым стане і нават ужо адной нагой у вечным асуджэнні, я раю табе выконваць тое, што я сказаў вышэй, з умовай, аднак, што ты будзеш гэта рабіць дзеля таго, каб атрымаць ад Бога праз міласэрнасць Святой Дзевы ласку навяртання і прабачэння грахоў, каб перамагчы свае злыя схільнасці, а не спакойна заставацца ў граху, нягледзячы на дакоры сумлення, насуперак прыкладу Езуса Хрыста і святых і словам Святога Евангелля. 

Практыкаванне: 

зрабі пастанову пазбавіцца ад адной са сваіх дрэнных звычак. 

На заканчэнне:

Малітва святога ружанца.