Дзевяты дзень: пазбягайце ўчынкаў цемры.

Малітва да Святога Духа

Прыйдзі, Стварыцель Дух Святы, 

Наведай вернікаў сваіх, 

Напоўні ласкай з вышыні 

Сэрцы, што створаны Табой.

Названы Суцяшыцелем, 

Ты - найвышэйшы Бога дар,

Жыцця крыніца і любоў, 

І ўзмацненне нашых душ.

Ты спасылаеш сем дароў, 

Бо маеш сілу ад Айца. 

Праз Сына абяцаны нам, 

Ты мноствам моваў прамаўляў.

Сваёю ласкай асвяці 

Сэрцы і розум нашыя,

І целы нам аздараві, 

І нашы цноты ўзмацняй.

Ты злога духа адгані 

І супакоем адары, 

Заўсёды за сабой вядзі 

І прабачэнне грэшным дай.

Дай праз Цябе Айца пазнаць 

І шлях да Сына пакажы.

Ты - Дух любові іх дваіх, 

Верым Табе ва ўсе часы.

Богу Айцу хвала заўжды

І Сыну ўваскрэсламу. 

Суцяшыцелю, Табе 

Хвала на вечныя вякі. Амэн.

Біблійнае чытанне: Рым 13, 11-14  

Ключавыя словы і фразы для разважання

• «Адкінем учынкі цемры»

• «Будзем паводзіць сябе прыстойна»

• «Апранемся ў Пана Езуса Хрыста» 

11 Вы ведаеце, што настала ўжо пара, каб вы абудзіліся са сну, бо цяпер збаўленне бліжэй да нас, чым тады, калі мы паверылі. 12 Ноч мінула і наблізіўся дзень. Таму адкінем учынкі цемры і апранемся ў зброю святла. 13 Як у дзень, будзем паводзіць сябе прыстойна, не ў гулянках ды п’янстве, не ў распусце ды разбэшчанасці, не ў сварках ды зайздрасці, 14 але апраніцеся ў Пана Езуса Хрыста і не дагаджайце целу ў пажадлівасці.

Чытанне святога Людвіка дэ Манфора: Трактат аб сапраўдным ушанаванні Найсвяцейшай Дзевы 108 

Ключавыя словы і фразы для разважання:

• Пазбягайце граху

• Наслядуйце цноты Марыі

• Якія дзесяць цнотаў Марыі?

• Яе глыбокая пакора, 

• Яе жывая вера, 

• Яе сляпая паслухмянасць, 

• Яе няспынная малітва, 

• Яе цалкавітае ўтаймаванне цела 

108. Па-трэцяе, сапраўднае ўшанаванне Святой Дзевы святое, гэта значыць, яно дае душы ласку пазбягаць граху і наследваць цноты Найсвяцейшай Дзевы, асабліва Яе глыбокую пакору, жывую веру, сляпую паслухмянасць, няспынную малітву, поўнае ўтаймаванне плоці, боскую чысціню, гарачую любоў, гераічную цярплівасць, анёльскую пяшчотнасць і боскую мудрасць. Гэта дзесяць галоўных цнотаў Найсвяцейшай Дзевы. 

Практыкаванне: 

выбяры якую-небудзь цноту Марыі і практыкуй яе на працягу дня.  

На заканчэнне:

Малітва святога ружанца.