15. Як дасягнуць сціслай еднасці з Марыяй

Як дасягнуць сціслай еднасці з Марыяй?

Ты можаш свабодна карыстацца ўсімі сродкамі, якія знойдзеш, каб лепш маліцца да Марыі, часцей пра Яе памятаць, дасканала Яе ўшаноўваць і пашыраць Яе хвалу. Вось некаторыя з іх:

Павесь у пакоі абраз Маці Божай. Уяўляй, што гэта не абраз ці фігура, а Яна Сама тут прысутная. Маліся да Яе, як да прысутнай. Паводзь сябе так, як бы Яна сама асабіста была ў цябе. 

Раніцай, або кожны раз, калі выходзіш з дому, папрасі Марыю аб блаславенстве на ўвесь дзень і зрабі знак крыжа. Яна сапраўды цябе паблаславіць.

Імкніся ўсё рабіць з Марыяй. Уяўляй сабе, што Яна паўсюль ідзе з табой. Запрашай Яе ўсюды, куды ідзеш. Хто навучыўся ўтрымліваць у сабе свядомасць Марыі, мае вялікі скарб. Такому чалавеку нашмат лягчэй будзе ўсё аддаваць і ўсяго прасіць.  

Вучыся ўсё рабіць у Марыі. Уяўляй сабе, што ты ў Яе Найчысцейшым і поўным супакою Сэрцы, як у святыні, цалкам ахінуты Ёй. Няхай цябе агарне Яе ўнутраная атмасфера. Тады ты будзеш амаль спантанна пазбягаць усяго, чаго ў Ёй быць не можа: неспакою, шуму, нэрвовасці, злосці, эгаізму… Ты будзеш спантанна насычацца Яе цнотамі і дарамі: пакорай, спакоем, чыстасцю, даверам... 

Уяўляй сабе, што ты глядзіш Яе вачыма на свет і людзей, што любіш Яе Сэрцам. Разважай часта над Яе жыццём. Не затрымлівайся, аднак, на паверхні падзеяў, апісаных у Евангеллі. Старайся зразумець Яе духа. Уяўляй сабе, што Яна тады думала, якія ў Яе былі пачуцці і прагненні. Такім чынам ты прасякнеш у Яе ўнутраны свет. Прасі, каб Яна сама тады ўдзяліла табе Свае перажыванні і пачуцці і вучыла цябе Сябе. Прагні ўсё рабіць дзеля Яе. Не бойся пакрыўдзіць Бога. Яна ўсё аддае Хрысту, нічога не затрымлівае дзеля Сябе. У Ёй усё імкнецца да Бога, як рака да мора. Калі ведаеш пра гэта, не бойся брацца дзеля Яе за вялікія справы. Такім чынам ты будзеш рабіць гэта для Бога, а Бог узнагародзіць цябе за гэта больш чым, калі б ты напрамую ахвяраваў усё Яму. 

Амінаем тут заахвочванне да малітвы, набажэнстваў і актаў ушанавання да Маці Божай, бо само сабой зразумела, што той, хто Яе любіць і аддае сябе Ёй, не ўпусціць ніводнай магчымасці, каб Яе ўшанаваць, з Ёй паразмаўляць, заахвоціць іншых больш Яе любіць.