Першы дзень: не ісці за духам гэтага свету

Малітва да Святога Духа

Прыйдзі, Стварыцель Дух Святы, 

Наведай вернікаў сваіх, 

Напоўні ласкай з вышыні 

Сэрцы, што створаны Табой.

Названы Суцяшыцелем, 

Ты - найвышэйшы Бога дар,

Жыцця крыніца і любоў, 

І ўзмацненне нашых душ.

Ты спасылаеш сем дароў, 

Бо маеш сілу ад Айца. 

Праз Сына абяцаны нам, 

Ты мноствам моваў прамаўляў.

Сваёю ласкай асвяці 

Сэрцы і розум нашыя,

І целы нам аздараві, 

І нашы цноты ўзмацняй.

Ты злога духа адгані 

І супакоем адары, 

Заўсёды за сабой вядзі 

І прабачэнне грэшным дай.

Дай праз Цябе Айца пазнаць 

І шлях да Сына пакажы.

Ты - Дух любові іх дваіх, 

Верым Табе ва ўсе часы.

Богу Айцу хвала заўжды

І Сыну ўваскрэсламу. 

Суцяшыцелю, Табе 

Хвала на вечныя вякі. Амэн.

Біблійнае чытанне: Рым 12, 1-2 

Ключавыя словы і фразы для разважання:

• "не дастасоўвайцеся да гэтага веку"

• "Радуйцеся і весяліцеся!"

• "Радуйцеся, бо вялікая ўзнагарода вашая ў нябёсах!"

1 Прашу вас, браты, праз літасць Божую: аддайце целы вашыя на ахвяру жывую, святую, прыемную Богу як разумнае служэнне вашае. 2 І не дастасоўвайцеся да гэтага веку, але перамяняйцеся праз абнаўленне розуму, каб вы пазналі, якая воля Божая, што добрае, прыемнае і дасканалае. 

Чытанне святога Людвіка дэ Манфора: Таямніца Марыі 3 

Ключавыя словы і фразы для разважання:

• "Душа, воля Божая аб табе ў тым, каб ты была святой."

• "Стань святой!"

3. Душа, жывы вобраз Бога, адкуплены найкаштоўнейшай Крывёю Езуса Хрыста, воля Божая аб табе ў тым, каб ты была святой, як Ён, у гэтым жыцці і слаўнай, як Ён, у іншым.

Набыццё святасці Божай - гэта тваё бясспрэчнае пакліканне; менавіта ў гэтым кірунку ўсе твае думкі, словы і ўчынкі, пакуты і рухі твайго жыцця павінны імкнуцца; у іншым выпадку ты будзеш супраціўляцца Богу, не выконваючы тое, дзеля чаго Ён цябе стварыў і захоўвае цяпер.

O! Які цудоўны твор! Пыл пераменены ў святло, бруд у чысціню, грэх у святасць, стварэнне ў Творцу і чалавек у Бога! O цудоўны твор! Я паўтараю гэта, але твор складаны сам па сабе і немагчымы для адной чалавечай натуры; толькі Бог праз сваю ласку, незлічоную і непараўнальную, можа здзейсніць гэта; і стварэнне ўсяго сусвету не ідзе ў параўнанне з гэтым шэдэўрам. 

Пытанне: 

Што ты думаеш пра запрашэнне ісці МАЛЫМ ШЛЯХАМ паводле святога Людвіка дэ Манфора? Што ты думаеш пра заклік да святасці, прысвячаючы сябе Езусу праз Марыю? 

На заканчэнне:

Малітва святога ружанца.