13. Галоўныя ступені на шляху аддання

Якія галоўныя ступені на шляху аддання? 

Усе людзі знаходзяцца на розных узроўнях аддання.

Змаганне са смяротнымі грахамі.    

Першы ўзровень, або першы этап на шляху аддання, могуць дасягнуць тыя, хто змагаецца са смяротнымі грахамі.

Ты можаш аддаць сябе Маці Божай нават жывучы ў смяротным граху, нават будучы вялікім грэшнікам, але з умовай, што ты шчыра прагнеш вызваліцца ад грахоў і стала жыць у асвячальнай ласцы, а таксама гатовы на ўсё, толькі б вытрываць у гэтай ласцы. Ты павінен зразумець, што табе пагражае вечнае асуджэнне і пасля добрага разважання вельмі шчыра сказаць: "Маці Божая, я дазваляю Табе рабіць са мной усё, толькі б я не ўчыніў смяротнага граху.  Ты можаш цалкам змяніць маё жыццё, забраць усё, што цягне мяне да граху, толькі б я больш цяжка не грашыў».

Такі павінен быць акт аддання грэшніка.  За такі акт ты атрымаеш здольнасць прыняць ласку ахвоты жыцця ў асвячальнай ласцы і пазбягання граху. Ты будзеш ахвотна і як мага хутчэй ісці да споведзі, калі не вытрываеш і зграшыш. У табе запануе тады радасць Божага жыцця.

На гэтым этапе ты павінен прымаць Св. Камунію прынамсі ў першыя пятніцы і першыя суботы месяца, а таксама ў Марыйныя святы. Гэта дапаможа табе вытрываць у стане ласкі.

Змаганне з лёгкімі грахамі.

Другі ўзровень, або другі этап на шляху аддання Найсвяцейшай Панне Марыі, прызначаны для тых, хто змагаецца з лёгкімі грахамі.

Калі звычайна ты жывеш у стане ласкі і табе здараецца рабіць лёгкія грахі, з якіх ты хацеў бы вызваліцца, можаш прачытаць такі акт: "Маці Божая, я дазваляю табе рабіць са мной ўсё, толькі б я не рабіў лёгкіх грахоў. Вазьмі мой розум і ўсё ў ім пазмяняй, каб я лічыў добрым тое, што Ты лічыш добрым і меў агіду да таго, што Ты лічыш агідным. Вазьмі маю волю, каб я заўсёды жадаў таго, што Ты жадаеш, забяры маё сэрца, каб я любіў тое, што Ты любіш, і не любіў таго, што Ты не любіш».

Трэба над гэтым актам добра паразважаць, каб прачытаць яго ў цалкавітым перакананні. Калі ты ўчыніш гэты акт, будзеш здольны прыняць ласку, якая паступова вылечыць цябе з хваробы паўсядзённых грахоў. Імкніся прымаць Св. Камунію прынамсі раз у тыдзень, а нават часцей, і вучыся чытаць Евангелле, атрымаеш тады шмат святла і ахвоты да добрага. На другім этапе можна далучыцца да апостальства марыйных груп, або іншымі словамі да марыйнага апостальства.    

Здабыванне цнотаў.    

Трэці ўзровень, або трэці этап на марыйным шляху могуць дасягнуць тыя, хто звычайна ўжо не чыніць свядомага лёгкага граху. Хто свядома не робіць лёгкага граху, або гэта здараецца ў яго рэдка, атрымае ад Марыі ласку. Яна заключаецца ў тым, што чалавек прагне ні ў чым Богу не адмовіць і ўсё больш Яго любіць. Няхай ён учыніць такі акт: „Маці, я дазваляю Табе рабіць са мной ўсё, толькі б я ні ў чым Табе і Езусу не адмовіў, толькі б Езуса і Цябе любіў так, як Ён гэтага прагне. Я згаджаюся на кожнае цярпенне, якое дзеля гэтага патрэбна, i якое Езус захоча мне паслаць.”

Дзякуючы гэтаму акту ты атрымеш ласку, якая дапаможа табе ўсё часцей кіравацца натхненнямі Святога Духа. Цяпер ты будзеш жыць як бы пад вокам Марыі ў пачуцці Яе прысутнасці і позірку. На гэтым узроўні ты напэўна будзеш прагнуць прымаць Езуса штодзённа або так часта, як гэта магчыма.  Будзеш мець вялікае жаданне, каб людзі шанавалі і любілі Маці Божую, і каб як мага больш людзей аддалася Ёй, і таму захочаш вучыць іх любові да Марыі і гэтаму шляху аддання.